Unsere Anlässe  

Keine Termine
   
Filter
  • 80. Geburtstag von Peter Artho

    Für unseren geschätzten Ehrenpräsidenten

    Peter Artho

    zum 80. Geburtstag

    gewidmet von der CMV-Blasmusik

     

    Liebä Peter, es isch üs ä ganz ä bsundärs Vergnüegä,

    eim vo üsnä Gründervätter zum 80. Geburtstag dörfä z‘gratulierä.

    Mängs, mängs Johr häsch du üs als Presidänt mit Freudä agfüehrt,

    häsch dis Herzbluet in Verein gsteckt und öppemol zu Tränä grüert.

     

    Mir chönds chum glaubä, du würksch immer so zwäg und ufgstellt,

    bisch du würkli achzgi, häsch di nöd i dä Johr verzellt ?

    Du gsesch nämlich nöd nur optisch sehr jung us,

    nei, du chasch nu jufle und lustig sy mit ganz vill Pfuus.

     

    Leider hämmer üs i dä letschtä Zyt nöd äso vill gseh,

    obwohl mir doch wüssät, ohni CMV-Musig täts dir sicher weh.

    D’Gründ sind bekannt, mittlerwil usdiskutiert und hoffentli verzeit,

    mir sind froh, dass alli inzwüsche vergässä händ und mer sich wider vertreit.

     

    Eis isch aber Tatsach, i all dänä Johr häsch du CMV immer mit Freudä gleitet,

    aber üs leider nu gar niä musikalisch begleitet.

    Äs wär üs ä riisä Ehr, wänn du jetzt eimool würsch ä Usnahm machä,

    damit mir zäme chönd ganz unzwungä musiziere und lachä.

     

    Lueg emol, was mir dir mitbrocht händ; äs isch CMV-Pauke det hinä,

    si isch immer nu wunderschön, aber leider chamer si nümä stimmä.

    Zum numä inäs Eggli stellä, wo si niemär gseht und cha berüerä,

    isch si eifach z’schad: Weisch nienä äs Plätzli womer si chönnt plazierä ?

     

    Also wie ischäs, dörfet mir dich i di letscht, aber wertvollscht Reihä bittä,

    damit du eis oder zwei Stückli mit üs tuesch bestrittä ?

    Kei Angscht, mini Frau meint: Pauke schloh cha doch jedä, das isch Fakt

    und ich säg däzue: Das stimmt, nur hätt halt jedä sin eigenä Takt…

     

    Hütt würdet mir üserä Takt sehr gern emol dir apassä,

    das Gfühl muesch eifach miterläbe, ich tue nöd gspassä,

    gsesch dänn quasi live, wivil Spass dassäs üs Musikantä macht,

    wänn s’ufgstellti Publikum mitsingt, klatscht und lacht.

     

    Falls es dir pinlich isch, dänksch du scho vill z’wit,

    uf sonen Gedankä chämt nämli niemert, mir sind alles liebi Lüt!

    Susch hettsch du üs jo sicher bestimmt gar nöd igladä a dim grosse Tag

    und do däfur danket mir dir vo ganzem Herze, das isch gar kei Frag !

     

    Vo dä schönä altä Zytä chömer  leider nur nu träumä, das isch halt eso,

    aber mir chönd immer nu guet singä, lachä und fuuli Sprüch useloh.

    Peter du bisch dä Chef und chasch üs säge wänn mir müend verreisä,

    hei gönd mir aber sowieso erscht, churz voräm entgleisä !

     

    Alli Awesendä wünschät dir und dä Agnes nu mängs, mängs glücklichs Johr,

    ganz gueti Gsundheit, vill Glück, Z’frideheit und nümä meh graui Hoor…